Би зүүний үзүүрт тогтон алагхан энэ дэлхийд
аав ээждээ жаргал бэлэглэн хүмүүн заяаг олсон
Би гудайхыг хүсэхгүйн учир
хатуу хөтүү хорвоогийн жамыг дагаж биш сөрж
тулганы гал мэт дүрэлзэх
ганган улаан буудайн ганц ширхэг түрүү
Би алдаа бүхнээсээ ухаарч хэрсүүждэг
Амьдрахын төлөө соёолж ургадаг
алтан шаргал буудай
Би үндэснээсээ шим авч
Үүлгүй хөх тэнгэрт тэмүүлэх
Өчүүхэн төдий арвайн түрүү
Би хайраар дутвал цагийн аясаар хагдрах
намрын навчис шиг хатаж гандах
Хөөрхий нэгэн арвай
Би хайраас гэдэг хөрснөөс дэлгэрсэн
Талын салхинд ганхах арвайн түрүү
Би өвдөг сөхрөхдөө сөрж босдог
Эхийн сүүгээр тэтгүүлж
Тэнгэрт тэмүүлж ургадаг ширхэг ганц арвай
Би арвай буудай
0 comments:
Post a Comment